ಬೆಂಗಳೂರು: ಕರ್ನಾಟಕದಲ್ಲಿ ಮುಂಗಾರು ಮಳೆ ಅಬ್ಬರಿಸುತ್ತಿದ್ದು, ರಾಜ್ಯದ 14 ಜಲಾಶಯಗಳಲ್ಲಿ ನೀರಿನ ಮಟ್ಟವು ಏರಿಕೆಯಾಗಿದೆ. ನೀರು ಹೆಚ್ಚು ಸಂಗ್ರಹವಿರುವ ಜಲಾಶಯಗಳ ಪೈಕಿ ಕಾವೇರಿ ಜಲಾನಯನ ಪ್ರದೇಶದ ಡ್ಯಾಂಗಳು ಮುಂಚೂಣಿಯಲ್ಲಿದ್ದು, ನೀರಿನ ಮಟ್ಟ ಫಸ್ಟ್ಕ್ಲಾಸ್ ಇದೆ. ಇನ್ನು ಕೃಷ್ಣಾ ಜಲಾನಯನ ಪ್ರದೇಶದ ಡ್ಯಾಂಗಳು ಅರ್ಧದಷ್ಟು ಭರ್ತಿಯಾಗಿದ್ದು, ಮಲೆನಾಡಿನ ಡ್ಯಾಂಗಳಲ್ಲಿ ನೀರು ಕಡಿಮೆ ಇದೆ.
ಕೆಎಸ್ಎನ್ಡಿಎಂಸಿ ಮಾಹಿತಿ ಪ್ರಕಾರ, ಕಾವೇರಿ ನದಿ ಜಲಾಶಯಗಳು ಶೇ 66 ರಷ್ಟು ತುಂಬಿದ್ದು, ಕೃಷ್ಣಾ ನದಿಯ ಜಲಾಶಯಗಳು ಶೇಕಡಾ 51 ರಷ್ಟು ಭರ್ತಿಯಾಗಿವೆ. ಆದರೆ, ಮಲೆನಾಡಿನ ಡ್ಯಾಂಗಳು ಶೇಕಡಾ 35 ರಷ್ಟು ಮಾತ್ರ ಭರ್ತಿಯಾಗಿವೆ. ಸದ್ಯ ಮುಂಗಾರು ಆಗಮಿಸಿ ಒಂದೂವರೆ ತಿಂಗಳಾಗಿದ್ದು, ಮುಂದಿನ ಎರಡೂವರೆ ತಿಂಗಳು ಮಳೆಯಾಗಲಿದ್ದು, ಜಲಾಶಯಗಳೆಲ್ಲಾ ಭರ್ತಿಯಾಗುವ ಸಾಧ್ಯತೆ ಇದೆ.
ಕಳೆದ ವರ್ಷಕ್ಕೆ ಹೋಲಿಸಿದರೆ ದುಪ್ಪಟ್ಟು ನೀರು ಸಂಗ್ರಹ :
ಕಳೆದ ವರ್ಷ (2023) ಜುಲೈ 15 ಕ್ಕೆ ಹೋಲಿಸಿದರೆ ಕರ್ನಾಟಕದ ಜಲಾಶಯಗಳಲ್ಲಿ ನೀರಿನ ಮಟ್ಟವು ಈ ವರ್ಷ ದುಪ್ಪಟ್ಟು ಸಂಗ್ರಹವಾಗಿದೆ. ಕಳೆದ ವರ್ಷ ಈ ಸಂದರ್ಭದಲ್ಲಿ 14 ಜಲಾಶಯಗಳಲ್ಲಿ ಒಟ್ಟು 220 ಟಿಎಂಸಿ ನೀರಿತ್ತು. ಈ ವರ್ಷ 421 ಟಿಎಂಸಿ ನೀರು ಸಂಗ್ರಹವಿದೆ. ಈ ಮೂಲಕ ಹೆಚ್ಚುಕಡಿಮೆ ದುಪ್ಪಟ್ಟು ನೀರು ಡ್ಯಾಂಗಳಲ್ಲಿ ಇದೆ.
ಕಾವೇರಿ ಜಲಾಶಯಗಳು
- ಹಾರಂಗಿ – 83 % ಭರ್ತಿ
- ಹೇಮಾವತಿ – 61 % ಭರ್ತಿ
- ಕೆಆರ್ಎಸ್ – 55 % ಭರ್ತಿ
- ಕಬಿನಿ – 95 % ಭರ್ತಿ
ಮಲೆನಾಡಿನ ಜಲಾಶಯಗಳು
- ಲಿಂಗನಮಕ್ಕಿ – 34 % ಭರ್ತಿ
- ಸೂಪ – 36 % ಭರ್ತಿ
- ವರಾಹಿ – 25 % ಭರ್ತಿ
ಕೃಷ್ಣಾ ಜಲಾನಯನ ಪ್ರದೇಶದ ಜಲಾಶಯಗಳು
- ಭದ್ರಾ – 39 % ಭರ್ತಿ
- ತುಂಗಭದ್ರಾ – 31 % ಭರ್ತಿ
- ಘಟಪ್ರಭಾ – 52 % ಭರ್ತಿ
- ಮಲಪ್ರಭಾ – 34 % ಭರ್ತಿ
- ಆಲಮಟ್ಟಿ – 74 % ಭರ್ತಿ
- ನಾರಾಯಣಪುರ – 68 % ಭರ್ತಿ